SEMAR TILIK JAKARTA

Rampung subuhan neng Kahyangan,  Semar bablas mudhun maring Jakarta, saprelu tilik anake lanang:

Gareng sing dadi pejabat Eksekutif, Bawor sing dadi Legislatif lan Petruk sing dadi Judikatif.

Semar wis pengeng kupinge mirengna anakke telu pada ribut bae neng Senayan.

Unggal ndina padudon bab anggaran, rebutan proyek lan apus-apusan

Mbuh kawit kapan ketelune koh tansah memungsuhan.

Semar wis bola-bali paring pepeling, liwat SMS, liwat WA, Facebook lan Instagram

Pijer ora tau direwes di gubris.

Malah padha gawe ada-ada nganakna Semar anyar

Buta Cakil sing lagi pincang kelara-lara digered dipacaki ben memper Semar

Gambare dipajang neng sekabehe surat pawarta nganggo hastage ora kira-kira: #AYO GANTI SEMAR

Kahanan sengsaya suwe tambah panas brangasan

Bojleng, bojleng, iblis laknat lakune jag-jagan.

Ki Dhalang sanalika menyat, methentheng karo tudhing-tudhing nuli mbentak semu eram:

"Yen pancen kabeh wayang ora kena ditata dituturi, tetep nganggo kerepe dhewek... Bubar...! Ayo bubaaarrr...!"

Ki dhalang nuli mudhun skang panggung cucul sarung.

Cantrike gage mbengketi wayang wadhahi kothak, penayagane bungung.

Penonton umyung rame surak-surak

Mbuh nyuraki Semar apa nyuraki Hastag.

Muga bae dudu nyuraki dhalange sing wis anteng meneng jegang neng risban

Semar...Semaaarr

Sugeng Joko Utomo, Tasikmalaya, 24-08-3018

Lingkar Sastra Gombong (Lisong)