Turning the Page: Reflections, Lessons, and Goals for the New Year | نئے سال کا آغاز: سوچ، سبق اور مقاصد کی جانب ایک نیا قدم

سال 2024 اپنی پوری آب و تاب کے ساتھ اختتام پذیر ہوا. بہت سے تجربات سے ہمیں آشنا کرکے، کئی رشتوں سے شناسائی دے کر، کئی اچھے لوگوں سے ملا کر اور کئی برے لوگوں سے بچا کر یہ سال ہر قسم کی اچھی بری یادیں ہمارے ذہنوں پر نقش چھوڑ کر جا چکا ہے. سال 2024 کا آخری سورج ڈوبتے دیکھ کر میں یہ سوچ رہا تھا کہ زندگی کا پہیہ کس قدر تیزی سے چلا کہ ہمارے وہم و گمان میں بھی یہ تصور نہ تھا. مجھے آج بھی یاد ہے جب ہم چھوٹے ہوا کرتے تھے تو سوچتے تھے، بات صرف سوچنے پر ہی محدود نہ تھی بلکہ ڈراموں اور کارٹونز میں یہ دکھایا جاتا تھا کہ آج سے پندرہ بیس سالوں بعد یہ عظیم کارنامے ہو جائیں گے. تب سوچ کر بڑی حیرانی ہوتی تھی، مگر زمانہ کو اس قدر تیزی سے بدلتے دیکھ کر اب یقین ہو چلا ہے کہ ہماری سوچ سے بھی زیادہ تیزی سے زمانہ بدل گیا ہے. ٹیکنالوجی کا اس قدر تیز ترین سفر شاید صدیوں میں بھی کبھی نہیں ہوا ہوگا، جس کا مشاہدہ ہم نے کیا ہے. مگر تبدیلی کا اصول ہے کہ یہ بتدریج آتی ہے. یکدم سے تو صرف قدرتی آفت آتی ہے. انسانوں کے مزاج میں، انداز میں، عادات و اطوار میں اور ایجادات میں تبدیلی رفتہ برفتہ آتی ہے. ہم ایک ایک سیڑھی چڑھتے ہوئے آگے بڑھتے ہیں. اس لیے شاید میرا یہ کہنا بجا ہوگا کہ 31 دسمبر 2024 کی رات 11 بج کر 59 منٹ کی دنیا اور یکم جنوری کی رات 12 بجے کی دنیا میں کوئی ایسا بڑا تغیر رونما نہیں ہوا جس کی بنیاد پر میں یہ کہہ سکوں کہ نیا سال آگیا تو کچھ بدل گیا یا بدل جائے گا. یقیناً انسانی تاریخ میں ہمیشہ تبدیلی آہستہ آہستہ آتی ہے. جیسے ہم نے 2024 میں کئی واقعات ایسے دیکھے جو ہم نے پہلے نہیں دیکھے تھے. خود ہماری ذاتی زندگی میں ایسے نئے اور خوشگوار واقعات جنم لیتے ہیں کہ آنے والی زندگی کے لیے حسین یادیں بن جاتے ہیں. پھر ان یادوں کے سہارے ہم اپنی آنے والی زندگی گزارتے رہتے ہیں. وہیں کچھ ایسے صدمے بھی زندگی میں آجاتے ہیں جن کا روگ ساری زندگی ساتھ لگا رہتا ہے۔

محاسبہ:

گوکہ میں اوپر یہ واضح کر چکا ہوں کہ 11 بج کر 59 منٹ سے 12 بجے تک کا فاصلہ طے کرنے میں کوئی اتنی بڑی تبدیلی واقع نہیں ہوتی. محض ایک ہندسہ ہی تبدیل ہوتا ہے. لیکن اس ہندسہ کی تبدیلی کو بنیاد بنا کر ہم اپنی زندگی ضرور تبدیل کر سکتے ہیں. آخر کیسے؟ وہ ایسے کہ ہم اس سال نو 2025 کے لیے ایسے اہداف مقرر کریں جو ہماری زندگی کو نہ صرف معنی خیز اور بامقصد بنائیں بلکہ ساتھ ہی ساتھ زندگی گزارنے کا حقیقی لطف بھی حاصل ہو. نئے اہداف کے حصول میں سب سے پہلی اور لازمی چیز محاسبہ ہے. یعنی ہم اپنے گزشتہ سال کا محاسبہ کریں. کچھ وقت نکالیں. اپنے لیے. اپنی ذات کی بہتری کے لیے. کہ ایسی کون سی غلطیاں تھیں جن کی وجہ سے ہماری صلاحیتیں ماند پڑتی گئیں؟ ایسی کون سی ہماری غلط فہمیاں تھیں جو اب دور ہو چکی ہیں؟ ایسی کون سی باتیں تھیں جو سارا سال ہمارے لیے دکھ کا باعث بنیں؟ ایسی کون سی چیزیں تھیں جن سے ہمیں جانی و مالی نقصان اٹھانا پڑا؟ وہ کون سی کوتاہی تھی جس کا شکار ہم سارا سال ہوتے رہے؟ کن امور کی جانب ہم توجہ دینا بھول گئے؟ ہمارے ذہنی تصورات میں کتنی تبدیلی آئی؟ علم کے اعتبار سے اور عملی طور پر ہم میں کتنی مثبت تبدیلی آئی اور کہاں ہم سے غلطی واقع ہوئی؟ جب ان سارے سوالات کے جوابات ہمیں مل جائیں گے تو اچھی خاصی فزیبلٹی رپورٹ تیار ہو جائے گی جس کی بنیاد پر ہم اپنے اگلے سال کے اہداف مقرر کر سکتے ہیں اور ان رکاوٹوں اور غلطیوں سے بچتے ہوئے انہیں حاصل کرنے کا سفر شروع کر سکتے ہیں.

نئے اہداف:

محاسبہ کرکے اپنے گریبان میں جھانکنے کے نتیجے میں سب سے پہلا فائدہ تو یہ حاصل ہوگا کہ ہمیں اپنی غلطیاں اور کوتاہیاں واضح طور پر معلوم ہوں گی. جس شخص کو اپنی غلطیوں کا علم ہو جائے اس کے لیے درست فیصلے کرنا نہایت آسان ہو جاتا ہے. اس کے بعد ہمیں یہ کرنا ہوگا کہ ایک چیک لسٹ یا ٹو ڈو لسٹ تیار کرنی ہوگی. اب تک جو ہوا سو ہوا. مگر اب یہ عزم کرنا ہوگا اس سال سے وہ غلطیاں دوبارہ نہیں دہرانی ہیں جو پہلے کر چکے. اب خود کو ایسی سرگرمیوں سے دور رکھنا ہوگا جو ہمارے مستقبل کے لیے زہر قاتل ثابت ہو سکتی ہیں. اس فہرست میں کرنے کے بہت سارے کاموں کو آپ ترجیحی بنیادوں پر لکھ سکتے ہیں. مثلاً: میں ایک ہدف طے کر لوں کہ میں روزانہ صبح آدھا گھنٹہ ورزش کروں گا. ہر ہفتے کچھ رقم صدقہ کروں گا. ہر مہینے اپنے لیے اتنی بچت کروں گا. یا اسے اپنے طور پر ہر شخص ہفتہ دس دن کے حساب سے بھی تقسیم کر سکتا ہے. پھر ہمیں کسی سے کہلوانے یا مجبور کروانے کے بجائے خود سے یہ عہد کرنا ہوگا کہ ہم اپنے ان اہداف کے حصول کے لیے ہرممکن کوشش کریں گے. جتنا ہو سکا، بروقت ان اہداف تک اپنے سفر کر طے کرنے کی کوشش کریں گے اور ان اہداف کی راہ میں آنے والی ہر رکاوٹ کو عبور کرکے دم لیں گے. یقین مانیں اگر آپ نے اس سال کی ابتداء پر یہ کام کر لیا تو آپ کا یہ سال پچھلے سال سے بہت بہتر اور تبدیل ہوگا. ورنہ سوائے ہندسے کی تبدیلی کے یہ سال آپ کی زندگی میں کوئی بڑی تبدیلی نہیں لا سکے گا.