Sweltering in the Heat | گرمی سے بے حال میں

یوں تو عالمی طور پر پوری دنیا میں ہی موسمی حالات بدل رہے ہیں. انسانوں کی غیر معمولی تعمیر و ترقی سے قدرتی موسی حالات پر خاصا اثر پڑ رہا ہے. مگر اس سال پاکستان میں جس قدر موسمیاتی تبدیلی دیکھنے میں آئی ہے، وہ نہایت پریشان کن ہے. اس سال ملک بھر میں اور خصوصاً شہر کراچی میں بھرپور موسمیاتی تبدیلی محسوس کی جا رہی ہے. میں نے کچھ روز قبل بھی ایک بلاگ میں اس کا تذکرہ کیا تھا کہ کراچی شہر میں گرمی کا بہت زیادہ زور ہوتا ہے. ساحل سمندر قریب ہونے کی وجہ سے ہوائیں تو چلتی رہتی ہیں مگر ہوا میں نمی کا تناسب بہت زیادہ ہونے کی وجہ سے گرمی برداشت سے باہر ہو جاتی ہے. میری یہ بلاگ دیکھ کر یقیناً کچھ لوگ اپنے ممالک کی گرمی کا تذکرہ کریں گے. ممکن ہے کہ ان کے ہاں گرمی کراچی سے بھی زیادہ ہو لیکن وہی بات ہے کہ ہر شخص کو اپنے اور بیتی کوئی کہانی زیادہ دردناک محسوس ہوتی ہے. سو آج کی بلاگ میں، میں ذکر کرنے جا رہا ہوں کراچی کی اس گرمی کا جس نے مجھے بے حال کر کے رکھ دیا ہے.

ابلتی ہوئی ہانڈی:

میرا زیادہ تر کام چونکہ آنلائن ہی ہے، یہی وجہ ہے کہ میں گھر سے کم ہی باہر نکلتا ہوں. سودا سلف لانے کے لیے یا کسی اور کام کے لیے تھوڑی دیر کے لیے باہر جانا ہوتا ہے. اس تھوڑے سے دورانیہ میں بھی گرمی کے باعث جو کیفیت ہوجاتی ہے وہ ناقابل بیان ہے. میں تو ان مزدوروں کو دیکھ کر حیران ہوتا ہوں جو اس کڑکتی دھوپ میں صبح شام حلال کمانے کے لیے محنت کر رہے ہوتے ہیں. میں سوچتا ہوں تبھی اللہ پاک کو یہ بندے بہت محبوب ہیں جو محنت مشقت کرکے رزق حلال کماتے ہیں. ورنہ اس کڑکتی دھوپ اور گرمی میں کس کا دل چاہتا ہے کہ وہ باہر نکلے. خیر، باہر کی تو بات ہی الگ ہے. گھر میں باوجود ہوا کے گزران ہونے کے بھی اس قدر گھٹن ہو جاتی ہے کہ سانس لینا محال ہو جاتا ہے. گرمیوں میں تو کیفیت یہ ہوتی ہے کہ کپڑے دھوتے ہی خشک ہو جاتے ہیں اور پہنتے ہی گیلے ہوجاتے ہیں. گرمی کی شدت سے تو بسا اوقات یوں محسوس ہوتا ہے کہ ہمارا وجود آہستہ آہستہ پگھل رہا ہے. دماغ کام کرنا چھوڑ دیتا ہے. کچھ بھی سجھائی نہیں دیتا. بس دل چاہتا ہے کہ پر لگ جائیں اور اڑ کر کسی برفانی علاقے میں بندہ پہنچ جائے اور اس گرمی سے جان چھوٹے. ایسا لگتا ہے جیسے ابلتی ہوئی ہانڈی میں ہم سالن کی جگہ پک رہے ہوں. کوئی ہفتہ بھر قبل تو کراچی میں درجہ حرارت 50 ڈگری سے بھی زیادہ محسوس کیا گیا. اور نہایت افسوس سے کہنا پڑتا ہے کہ ہر سال ہیٹ اسٹروک کے باعث کئی جانیں ضائع ہو جاتی ہیں.

ہیٹ اسٹروک کا خطرہ:

ہیٹ سٹروک ایسی سنگین قسم کی بیماری ہے کہ اگر فوری علاج نہ کیا جائے تو موت تک بات پہنچ جاتی ہے. جب کوئی شخص عام حالات سے زیادہ شدید گرمی میں کام کرتا ہے اور اس کا جسم وہ گرمی برداشت نہیں کر پاتا تو اس پر ہیٹ اسٹروک کا اٹیک ہو جاتا ہے. اور اس کے جسم کے اعضاء کام کرنا چھوڑ دیتے ہیں. خاص طور پر بچے، بوڑھے اور خواتین اس سے متاثر ہو سکتی ہیں. ایسی صورت میں فوری طور پر مریض کو ٹھنڈک پہنچانے کی ضرورت ہوتی ہے. ایسی صورت میں مریض کی دیکھ بھال اور خیال اشد ضروری ہوتا ہے. اسی وجہ سے شہر کراچی میں جابجا عوامی مقامات پر ہیٹ اسٹروک سے بچنے کے لیے کیمپ لگایے جاتے ہیں. لوگوں کو ٹھنڈا پانی دیا جاتا ہے. اگر کسی شخص کو لو لگ جائے تو اسے فوراً طبی امداد دی جاتی ہے. اس کے علاوہ آگہی مہم بھی چلائی جاتی ہے تاکہ عوام الناس کو اس حوالے سے معلومات دی جا سکیں. لیکن اس سب کے باوجود بھی لوگ جان کی بازی ہار جاتے ہیں. میرا یہ ماننا ہے کہ عارضی تدابیر کے بجائے مستقل طور پر اہداف متعین کرکے کام کرنا چاہیے تاکہ گرمی کا مستقل علاج کیا جا سکے. ہم ایسے اقدامات کریں کہ جن کی وجہ سے موسمیاتی تبدیلی میں کمی آ سکے. جس قدر ہم قدرتی ماحول کے مطابق زندگی جییں گے. اسی قدر صحت و تندرستی ہماری زندگیوں میں آ سکے گی.

حل کیا ہے؟

اب سوال یہ پیدا ہوتا ہے کہ ایسا کون سا مستقل حل نکالا جائے کہ گرمی کی وجہ سے پیدا ہونے والی اس صورتحال کا ہمیشہ کے لیے تدارک کیا جا سکے. میرے ذہن میں چند باتیں آتی ہیں، جنہیں میں آپ سب سے شئیر کرنا چاہوں گا. اگر میرا پیغام میرے شہر میں رہنے والے کسی شہری تک پہنچے، اور وہ بھی میری موافقت کرے تو میں چاہوں گا کہ ہم سب مل کر یہ اقدامات کریں اور باشعور شہری ہونے کا ثبوت دیں. سب سے پہلے فوری طور پر ہمیں اپنی خوراک پر توجہ دینی ہوگی. ہمیں چاہیے کہ ہم ٹھنڈی غذاؤں کا استعمال کریں کیونکہ گرم تاثیر رکھنے والی غذائیں اندرونی طور پر ہمارے معدے اور جگر کی سوزش کا باعث بنتی ہیں. غذاؤں کے ساتھ ساتھ اپنے ارد گرد کے ماحول کو ہمیں صاف ستھرا اور ہرا بھرا رکھنا ہوگا. ہمیں ان درختوں کی افزائش کرنا ہوگی جو درجہ حرارت کو معتدل بناتے ہیں. آج اگر ہم مل کر ایک ہزار پودے لگاتے ہیں تو کل کو یہ تنآور درخت بن کر جتنے لوگوں کو چھاؤں دیں گے ہمارے لیے صدقہ جاریہ بنیں گے. ہمیں انڈسٹریز کو شہر سے دور لے جانے کی کوشش کرنی ہوگی. کیونکہ انڈسٹریز سے خارج ہونے والا دھواں اور فاضل مادہ بھی ماحولیاتی آلودگی کا سبب بنتا ہے. ہم اپنے ماحول کو جس قدر قدرتی، اور طبعی تقاضوں کے مطابق بنائیں گے، اس قدر ہی ہمارے لیے اس ماحول میں زندگی گزارنا آسان ہوگا. اور جس قدر ہم اس میں مصنوعی اور بناوٹی چیزوں کا اضافہ کریں گے. ہمارے لیے زندگی گزارنا اتنا ہی مشکل ہوگا. آئیے ہم سب مل کر یہ عزم کریں کہ ہم اپنے ماحول کو قدرتی حالات کے مطابق ڈھالنے کی کوشش کریں گے تاکہ ہم سکون کی زندگی گزار سکیں. اگر ہم آج ہی سے کوشش شروع کریں گے تو ہم نہ سہی مگر کل کو ہماری آنے والی نسلیں ضرور اس سے مستفید ہوں گی.