Protests in Karachi: The Parachinar Issue | کراچی میں احتجاج: پاراچنار کا مسئلہ

گزشتہ دنوں کی بات ہے. سال 2024 کا اختتام چل رہا تھا. شہر کراچی میں معمول کے مطابق کاروبار زندگی رواں دواں تھا. سب کچھ معمول کے مطابق چل رہا تھا. اچانک ہی خبریں آنی شروع ہوگئیں کہ شہر بھر میں احتجاجی دھرنوں کا آغاز ہو گیا ہے. میں عموماً ایسے اوقات میں خوش قسمتی سے گھر پر ہی ہوتا ہوں مگر اس وقت اتفاقاً میں گھر سے باہر تھا. میرا گھر شہر کراچی کے وسط میں ائیر پورٹ سے کچھ ہی دوری کے فاصلے پر واقع ہے. بری خبر یہ آئی کہ احتجاجی مظاہرین نے ائیر پورٹ روڈ پر دھرنا دے رکھا ہے. ایئرپورٹ کو آنے جانے والے تمام راستوں پر بدترین ٹریفک جام ہے اور دھرنا مظاہرین نے سڑکیں بلاک کر رکھی ہیں. میں نے مخالف سمت سے واپسی کا راستہ تلاش کیا مگر بے سود. دس منٹ کے راستے پر مجھے تقریباً ڈھائی گھنٹے لگے. راستے میں جا بجا مظاہرین اور پولیس والے پرتشدد کارروائیوں میں مصروف عمل تھے. بڑی مشکلوں سے گلیوں محلوں سے گزرتے ہوئے گھر پہنچا. گھر کے باہر بھی گاڑیوں کی لمبی قطاریں لگی تھیں. جن میں بچے، بوڑھے، جوان، گاڑی والے، بائیک والے حتیٰ کہ ایمبولینس میں بھی کئی مریض ٹریفک جام میں پھنسے ہوئے تھے. دل ہی دل میں کڑھتا رہا. سوچ رہا تھا کہ نہ جانے آخر ایسی کیا انہونی ہو گئی کہ شہر کو جام کر کے رکھ دیا گیا؟ آخر ایسا کیا مسئلہ ہو گیا کہ شہر کی سب پروازیں متاثر ہونے لگیں. قومی اور بین الاقوامی فلائٹس بھی روڈ بلاک ہونے کی وجہ سے منسوخ ہونے لگیں. ظاہر سی بات ہے، یہ بات پوری دنیا میں ہمارے لیے کوئی اچھا شگون نہیں رکھتی. خیر. میں نے جب اس کی تحقیقات کیں تو میں جس نتیجہ پر پہنچا، آپ کے سامنے رکھتا ہوں.

مسئلہ پارہ چنار:

پارہ چنار کا علاقہ پاکستان کے صوبہ کے پی کے میں واقع کرم ایجنسی میں پایا جاتا ہے. یوں تو یہ علاقہ تاریخی حیثیت بھی رکھتا ہے مگر چونکہ مقصد تحریر مسئلہ پارہ چنار ہے تو اسی پر بات کرنا زیادہ موزوں رہے گا. تقریباً گزشتہ بیس سال سے پارہ چنار میں دو مسلح گروپوں کے درمیان وقفے وقفے سے تصادم جاری ہے. کبھی ایک فریق کی جانب سے دوسرے کی نسل کشی کی جاتی ہے تو کبھی دوسرے کی جانب سے فرعونیت کا مظاہرہ کیا جاتا ہے. اگر معاملے کو دقت نظری سے دیکھا جائے تو دونوں فریق ہی بیک وقت مظلوم اور ظالم معلوم ہوتے ہیں. ان کی آپسی جنگ کے نتیجے میں اب تک ہزاروں افراد جان کی بازی ہار چکے ہیں. عسکری قوتوں نے جب اس معاملے کی روک تھام کی جانب قدم بڑھائے تو ان قوتوں نے عسکری طاقتوں کو بھی نہ بخشا اور موت کی نیند سلا دیا. یہ سرد جنگ تو کافی عرصہ سے ہی جاری تھی مگر گزشتہ دو تین ماہ سے اس میں یکایک شدت پیدا ہو گئی. ہم نے پارہ چنار کی چیک پوسٹس پر ایک جماعت کی جانب سے ملک پاکستان کے جھنڈے اتار کر اپنے جھنڈے لگانے کے مناظر دیکھے جو ریاست کو کھلم کھلا چیلنج دینے کے مترادف تھا. پھر جہاں ایک فریق نے دوسرے کو پچھاڑا تو دوسرے نے بھی بھرپور کارروائی کی. فریقین کے مابین مصالحتی کوششیں عرصہ دراز سے جاری ہیں مگر معاملہ جوں کا توں موجود ہے. ہم اس معاملہ کو آپسی خانہ جنگی اور ریاستی ذمہ داری سمجھتے ہوئے حکومت پر تکیہ لگائے بیٹھے تھے. مگر اس خانہ جنگی کے اثرات شہر کراچی تک پہنچے اور کچھ لوگوں نے سڑکیں بند کر دیں.

پریشانی در پریشانی:

پارہ چنار کا مسئلہ بلاشبہ ایک حقیقی مسئلہ ہے جسے جلد از جلد حل ہونا چاہیے. کئی معصوم بچوں عورتوں بوڑھوں اور جوانوں کی زندگیاں اس جنگ کی نذر ہو چکی ہیں. یہ سلسلہ اب رک جانا چاہیے. مگر اس مسئلے کے حل کے لیے پاکستان کی معاشی رگ شہر کراچی کو جام کر دینے سے پریشانی در پریشانی کی کیفیت پیدا ہو گئی. اسکول جانے والے بچوں سے لے کر آفس جانے والے پروفیشنل سبھی اس سے متاثر ہوئے بغیر نہ رہ سکے. کئی دن تک کے صبر آزما تجارب کے بعد حکومت نے بھی صورتحال کی نزاکت سمجھتے ہوئے معاملہ کے حل کی جانب دباؤ ڈالنا شروع کر دیا. یقیناً یہ حکومت کی جانب سے بھی کمزوری ہے کہ اپنے مسئلے کے حل کے لیے لوگوں کو مجبور ہو کر سڑکیں بند کرنے کی طرف آنا پڑتا ہے. حکومت کو بلیک میل کرنا پڑتا ہے جس کی قیمت عام عوام ادا کرتے ہیں. خیر سے دھرنا مستقل جاری تھا. مظاہرین کسی صورت اٹھنے پر آمادہ نہیں تھے. اسی اثناء میں ایک اور مذہبی جماعت کی جانب سے الٹی میٹم جاری ہو گیا کہ اگر فلاں جماعت نہ اٹھی تو ہم اس سے بھی زیادہ شہر بند کر دیں گے. گویا شہر کشتی کا اکھاڑا بن کر رہ گیا جہاں پہلوانوں کا دنگل جاری تھا.

قانون نافذ کرنے والے اداروں نے جب یہ بگڑتی صورتحال دیکھی تو بزور قوت تمام تر مظاہرین کو اٹھا دیا گیا اور خدا کی مہربانی سے شہر کے معمولات یومیہ بحال ہو گئے. حکومت مسئلہ پارہ چنار کے حل کی جانب بھی متوجہ ہوئی اور دونوں فریقوں کو صلح اور امن معاہدے کی پیشکش کی. صلح نامہ میں شرط رکھی گئی کہ دونوں فریق اپنے پاس کسی قسم کا اسلحہ نہیں رکھیں گے، تو اس پر ایک فریق بگڑ گیا اور صلح نامہ پر عمل درآمد نہ ہو سکا. معاملات تاحال تشویشناک ہیں. دھرنے اور احتجاج عارضی طور پر تو ختم ہو چکے ہیں مگر سرد جنگ اب بھی مستقل جاری ہے. پارہ چنار سے مستقل وفود کی آمد کا سلسلہ جاری ہے.

اللہ کرے اس مسئلے کا کوئی پائیدار، پر امن اور صلح پر مبنی حل نکل آئے اور شہداء کا خون رائیگاں نہ جائے۔