Blind Trust | اندھا اعتماد

"آج رات بارش نہیں ہوگی." یہ جملہ بھرے گاؤں میں سبھی کی مسرت کا باعث بنا. دن بھر کے تھکے ہارے کسانوں نے سوچا کہ آج رات آرام سے گزار کر بقیہ فصل کل کاٹ لیں گے. سبھی اپنی فصلوں کو چھوڑ کر سورج ڈھلتے ہی گھروں کو روانہ ہو گئے. مگر گاؤں کے چند جوان ایسے بھی تھے جو آج کا کام کل پر نہ چھوڑتے تھے. انہیں جب نجومی بڑھیا کی پیشگوئی معلوم ہوئی تو انہوں نے اس پر کان نہ دھرے اور مسلسل فصل کی کٹائی میں لگے رہے. وہ اپنی محنت سے بوئی ہوئی گندم کے بارے میں ہرگز بے فکر ہو کر اسے ضائع کرنے کا خطرہ نہیں مول سکتے تھے. انہیں کام کرتا دیکھ کر کچھ پرانے کاشتکار ان پر ہنسنے لگے کہ دیکھو! ان جوانوں کا خون بہت گرم ہے. یہ لالچی اور سست ہیں، جلد از جلد کٹائی کا کام کرکے آرام کرنا چاہتے ہیں. کچھ عمر رسیدہ کاشتکار انہیں یہ مشورہ دینے لگے کہ اب کام چھوڑو، رات سر پر آچکی ہے. بقیہ کام کل نمٹا لینا. لیکن ان باہمت جوانوں نے کسی کی پرواہ کیے بغیر شام تک اپنی فصل کی کٹائی کر لی. گندم کی کٹائی کے بعد اس کے خوشوں کو باندھ کر محفوظ مقام پر منتقل کیا اور اپنے گھروں کو روانہ ہو گئے. ان کے گھر والے اتنی دیر سے گھر آنے پر ناراض ہوئے مگر وہ چپ چاپ سے کھانا کھا کر نیند کی وادیوں میں کھو گئے.

طوفانی بارش:

رات کے آخری پہر قریب تین بجے ہوا کے زوردار جھکڑ چلنے لگے. یہ ہوا تھوڑی ہی دیر میں اس قدر زوردار آندھی کی شکل اختیار کر گئی کہ مضبوط درخت بھی اس کی بانہوں میں جھولنے لگے. اس آندھی کے ساتھ ہی طوفان بھی امڈ آیا. بارش شروع ہو گئی. زوردار آندھی نے ہر چیز کو الٹ پلٹ کر رکھ دیا. موسم کی یہ خطرناک صورتحال دیکھ کر کسان بھی چونک کر جاگ گئے. وہ قطعی طور پر اس غیر یقینی صورتحال کے لیے تیار نہ تھے. کچھ زورآور کسانوں نے فوراً اپنے کھیتوں کا رخ کیا. اپنی فصلیں بچانے کے لیے ترپال ڈالنے لگے مگر آندھی اس قدر زوردار تھی کہ وہ سب مل کر بھی اس کے سامنے بے بس ہو گئے. رفتہ رفتہ بارش اولوں میں تبدیل ہو کر ژالہ باری بن گئی. گندم کی لہلہاتی فصلوں کے بجائے برف کے ڈھیر پر منعکس ہوتی روشنی کے ساتھ صبح سورج طلوع ہوا. بارش اب تھم چکی تھی. جو لوگ رات کو نہ اٹھ سکے تھے. اب اپنی کاشت کی گئی فصل دیکھنے گئے تو وہاں سوائے برف کے گولوں کے کچھ بھی نہیں پایا. یہ رات ان پر قہر بن کر برسی. پورے گاؤں کا ذریعہ معاش بس یہ گندم کی فصلیں ہی تھیں جس پر وہ پورا سال گزارا کیا کرتے تھے. کئی مہینوں کی محنت کے نہتجے میں رات دن ایک کرکے انہوں نے فصل تیار کی تھی. مگر ایک رات میں ہی سب کچھ برباد ہو گیا.

نجومی بڑھیا:

لوگ جوق در جوق اب اس نجومی بڑھیا کی طرف جانے لگے جس نے کل یہ پیش گوئی کی تھی کہ بارش نہیں ہوگی. یہ گاؤں کی نوے سالہ بڑھیا تھی. جس کی اکثر پیشگوئیاں سچ ہی ثابت ہوتی تھیں. یہی وجہ تھی کہ پورا گاؤں اس کی بات پر اندھا اعتماد کرتا تھا. وہ جو بات کہہ دیا کرتی، اسے پتھر پر لکیر سمجھا جاتا تھا. یہی وجہ تھی کہ جب کل بڑھیا نے کہہ دیا کہ "آج رات بارش نہیں ہوگی" تو سبھی کسانوں نے اپنے کام کاج چھوڑ کر گھروں کا رخ کر لیا. اب یہ سب آفت زدہ لوگ اس بڑھیا کے گھر میں موجود تھے. ان کے چہروں پر بے بسی کے آثار واضح نظر آ رہے تھے. افلاس کے گہرے سائے ان کی آنکھوں میں منڈلا رہے تھے. سبھی خاموش نگاہوں سے بڑھیا کو گھور رہے تھے. بالآخر ایک عمر رسیدہ آدمی مجلس کا سکوت توڑتے ہوئے گویا ہوا: "آخر کیا ملا آپ کو ہم سے جھوٹ بول کر؟"

بڑھیا نے جواب دیا: "یہ میری پیش گوئی نہیں بلکہ تمہاری طبعی سستی تھی جس کی وجہ سے تم نے کام ادھورا چھوڑ کر آرام کو ترجیح دی." لوگ اس نجومی بڑھیا پر برہم ہو رہے تھے کیونکہ ان کا بہت زیادہ مالی نقصان ہو چکا تھا. اسی مجلس میں ان نوجوانوں میں سے ایک جوان بھی بیٹھا تھا جس نے کل ہی اپنی فصل کاٹ لی تھی اور بڑے نقصان سے بچ گیا تھا، اس نے جب صورتحال بگڑتی دیکھی تو اس معاملے کو حل کرنے کا طریقہ سوچنے لگا.

نوجوان کی تقریر:

چونکہ بڑھیا عمر رسیدہ خاتون تھی اور ماضی میں اس کی کئی پیش گوئیاں درست ثابت ہوئی تھیں. اس لیے کچھ لوگ بڑھیا کے طرف دار بھی تھے، جو اس کا دفاع کر رہے تھے. مگر زیادہ تر لوگ اپنی فصلوں کے نقصان کے غم و غصے کی وجہ سے رنج میں تھے. ایسے میں وہ جوان اٹھا اور بآواز بلند گویا ہوا: "کوئی بھی اس بڑھیا کو ملامت نہ کرے. بلکہ یہ آپ لوگوں کا اپنا قصور ہے کہ آپ نے قدرت کے واضح اشاروں کے باوجود ایک بڑھیا کی بات پر اعتماد کیا. محکمہ موسمیات نے بھی بارش کی پیش گوئی کر رکھی تھی. افق پر بادلوں کی بھی کمی نہ تھی، مگر آپ لوگوں نے احتیاطی تدابیر اختیار نہ کیں، بلکہ اس بڑھیا کی پیشگوئی پر بے فکر ہو گئے. اب جو نقصان ہوا ہے اس کے ذمہ دار بھی آپ سب ہیں."

اچانک مجمع میں سے ایک اور شخص گویا ہوا: "ہم نے تو ہمیشہ ان کی بات کو حقیقت سمجھا ہے. اس لیے ہم تصور بھی نہیں کر سکتے تھے کہ ایسا کچھ ہو سکتا ہے."

نوجوان زیرِ لب مسکراتے ہوئے بڑھیا سے گویا ہوا:"اماں جان! آپ نے کیا سوچ کر یہ پیش گوئی کی تھی کہ کل بارش نہیں ہوگی؟"

بڑھیا نے جواب دیا: "بیٹا! اگر سچ پوچھو تو مجھے بھی اندازہ تھا کہ بارش ہو سکتی ہے. لیکن اگر میں یہ نہ کہتی کہ کل بارش نہیں ہوگی تو میرے بیٹے رات بھر کام میں لگے رہتے. مجھے وحشت سی ہونے لگی تھی. اس لیے میں چاہتی تھی کہ میرے بیٹے جلد از جلد میرے پاس آجائیں. بس اس لیے میں نے کہہ دیا کہ آج رات بارش نہیں ہوگی."

گاؤں والوں نے جب یہ بات سنی تو اپنے آپ کو لعنت ملامت کرتے ہوئے، اپنی قسمت پر کفِ افسوس ملتے ہوئے واپس اپنے گھروں کو روانہ ہو گئے.

اسباب پر توکل:

ہمارا مذہب ہمیں یہ تعلیم دیتا ہے کہ پہلے اسباب کو اختیار کیا جائے، پھر توکل کیا جائے. جیسے کہ حضرت محمد صلّی اللّٰہ علیہ و سلّم سے ایک صحابی نے پوچھا کہ میں اونٹ کو باندھ کر پھر توکل کروں یا بغیر باندھے بے فکر ہو جاؤں؟ تو آپ صلّی اللّٰہ علیہ و سلّم نے جواب دیا: اعقِلْها وتوكَّلْ یعنی اسے باندھ دو پھر توکل کرو. (سنن ترمذی، حدیث نمبر: 2517) لہٰذا پتہ یہ چلا کہ اگر کوئی شخص اسباب اختیار کیے بغیر محض توکل کرتا ہے تو وہ بے وقوف ہے. اگر حقائق اور مشاہدات کسی چیز کے ہونے کی طرف اشارہ کرتے ہیں تو اسے جھٹلانا بہت ہی لغو بات ہے. بعض لوگ تقدیر پر ایمان لانے پر مطلب یہ سمجھتے ہیں کہ جب قسمت میں ایک چیز لکھی جا چکی ہے اور وہ ہو کر رہنی ہے تو پھر ہمارے کچھ کرنے یا نہ کرنے سے کیا فرق پڑے گا؟ مثلاً: اگر بارش کے نتیجے میں فصل نے تباہ ہونا تھا تو ہو گئی. حالانکہ یہ لوگ نہیں جانتے کہ ان کی تقدیر میں کیا لکھا ہے. یہ بھی تو ممکن ہے کہ تقدیر میں یہ لکھا ہو کہ اگر یہ اپنی فصل رات سے پہلے کاٹ لیں گے تو فصل محفوظ رہے گی ورنہ تباہ ہو جائے گی. انہوں نے فصل کو محفوظ نہیں کیا، تبھی یہ سزا بھگت رہے ہیں. اس لیے ہم تقدیر کا بہانہ بنا کر عمل سے چھٹکارا نہیں حاصل کر سکتے. ہمیں اپنے ذمے کا کام ہر حال میں کرنا ہوگا. جب ہم اپنی طرف سے سو فیصد عمل کر چکے ہوں اس کے بعد نتیجہ پر اطمینان رکھنے کا نام توکل ہے یعنی توکل ہمیشہ اسباب پر کیا جائے نہ کہ اندھا اعتماد.

حاصل شدہ سبق:

ہم اپنے معاشرے میں نگاہ دوڑائیں تو جابجا ایسے لوگ دکھائی دیں گے جو کسی آسرے پر تکیہ کیے بیٹھے ہیں. فلاں نے ایسا کہہ دیا تو بس وہی حرف آخر ہے. اس رویہ کی وجہ سے معاشرے میں بے یقینی کی سی کیفیت پیدا ہو رہی ہے. نجومیوں کی باتوں پر ہرگز کان نہ دھریں. کسی بھی ایسے شخص پر ہرگز اندھا اعتماد نہ کریں جو آپ کو مستقبل میں کسی ایسی مشکل اور پریشانی سے دوچار کر دے جس سے بچ نکلنے کا کوئی راستہ نہ ہو. کچھ لوگ ہاتھ دیکھ کر لوگوں کی تقدیریں بتاتے ہیں. میں نہیں جانتا وہ کیسے اندازے لگاتے ہیں. لیکن وہ جو کچھ کہتے ہیں، اس کے جھوٹ ہونے کا سو فیصد امکان ہے. حیرت تو اس بات پر ہے کہ اکیسویں صدی میں بھی لوگ نجومیوں پر یقین رکھتے ہیں اور قسمت کا حال جاننے کی کوشش کرتے ہیں. میرا نظریہ یہ ہے کہ ہماری قسمت اور نصیب ہماری محنت کا نتیجہ ہوتا ہے. ہم جیسا بوتے ہیں وہی کاٹتے ہیں. بہت ہی کم کوئی شاذ و نادر ایسا واقعہ ہوتا ہے کہ کسی کو غیر متوقع صورتحال کا سامنا کرنا پڑ جائے ورنہ قانون فطرت یہی ہے کہ انسان کو وہی حاصل ہوتا ہے جس کے لیے وہ محنت کرتا ہے. اس لیے سنی سنائی باتوں پر دھیان دینے کے بجائے محنت سے کام کرنے پر یقین رکھیں. زندگی میں کامیاب رہیں گے.