ရန်အောင်ချမ်းသာဘုရားကြီး

ဒီနေ့တော့ နေပြည်တော်၊ လယ်ဝေးမြို့နယ်မှာ ရှိတဲ့ ရန်အောင်ချမ်းသာဘုရားကြီးအကြောင်း တင်ပြချင်ပါတယ်။ ဘုရားကြီးဟာ နေပြည်တော်၊ ဒက္ခိဏခရိုင်၊ လယ်ဝေးမြို့နယ်၊ သပြေပင်အုပ်စု၊ ရွာသစ်ကြီးကျေးရွာ၊ ရန်ကင်းတောရကျောင်းအနီး မှာတည်ရှိပါတယ်။ ဉာဏ်တော်အမြင့် (၁၃၅) ပေရှိတဲ့ ထိုင်တော်မူ ရုပ်ပွားတော်ကြီးတစ်ဆူဖြစ်ပါတယ်။

ဘုရားကြီးကို တည်ထားကိုးကွယ်သူက စစ်တွေမြို့၊ ကမ္ဘာ့သာသနာပြုမဟာအဓိဌာန်ကျောင်းဆရာတော် ဘဒ္ဒန္တ ကုလရက္ခိတဖြစ်ပြီး တိုင်းရင်းသားများ စည်းလုံးညီညွတ်စေရန် ရည်ရွယ်ပါတယ်။ ၂၀၁၅ ခုနှစ်မှာ စတင်တည်ထားပြီး မွန်၊ ဗမာ၊ ရခိုင်၊ ရှမ်း တိုင်းရင်းသားများကို ကိုယ်စားပြုထားပါတယ်။

အရှေ့အရပ်မှာ ရှမ်းတိုင်းရင်းသား ကိုယ်စားပြုတာဖြစ်တာကြောင့် မုခ်ဦးရှေ့မှာ ကျားရုပ်ထု ရှိပြီး အရံစေတီ(၂၂)ဆူ၊

တောင်အရပ်မှာ ရခိုင်တိုင်းရင်းသားကိုယ်စားပြုဖြစ်ပြီး မုခ်ဦးရှေ့မှဘီလူးရုပ်ရှိပါတယ်။ အရံစေတီ (၂၃) ဆူပါ။

အနောက်အရပ်မှာတော့ မွန်တိုင်းရင်းသားကိုယ်စားပြုမုခ်ဦးဖြစ်ပြီးမနုဿီဟရုပ်တုရှိပါတယ်။ အရံစေတီ (၂၂)ဆူပါ။

မြောက်အရပ်ကတော့ ဗမာတိုင်းရင်းသားကိုယ်စားပြုဖြစ်ပြီး ခြင်္သေ့ရုပ်ထုရှိပါတယ်။ အရံစေတီ (၂၃) ဆူရှိပြီး အရံစေတီစုစုပေါင်း (၉၀) ဆူဖြစ်ပါတယ်။

ဘုရားကြီးရဲ့ထူးခြားချက်ကတော့ အရှေ့တောင်ထောင့် အရပ်မှာရှိတဲ့ နတ်ရုပ်ထုရဲ့ ခရုသင်းကနေရေစိမ့်ထွက်နေတာပါ။ ကျမကတော့ သတိမထားမိလို့ မှတ်တမ်းမတင်ခဲ့ရပါဘူး။ ဘုရားကြီးရဲ့မျက်နှာတော်မှာပျားစွဲနေတာကိုတော့ မှတ်တမ်းယူနိုင်ခဲ့ပါတယ်။ ဘုရားကြီးရဲ့ ပရဝုဏ်က (၃.၇၀) ဧကအကျယ်ရှိတာဖြစ်လို့ အခြားသာသနာ့အဆောက်အဦတွေလဲ ရှိပါသေးတယ်။ ဘုရားကြီးရဲ့ဗုဒ္ဓဘိသေကပွဲကို ဖေဖော်ဝါရီလမှာကျင်းပတယ်လို့သိရပါတယ်။

ထူးခြားချက်တွေ အများကြီးနဲ့ ရန်အောင်ချမ်းသာဘုရားကြီးကို အခါအခွင့်သင့်လျှင် သွားရောက်ဖူးမြော်စေချင်ကြောင်းနှင့် ရှုမျှော်ခင်းတွေ အလွန်လှကြောင်း သတင်းကောင်းပေးလိုက်ရပါတယ်။

@nweoomon
13-10-2021