埋尾畢業篇
首先，要頒個獎俾一路睇到呢篇嘅你，多謝支持先…… 💁💁
喺之前咁多堂，我哋go through咗由認識加密貨幣到買幣到存款生息嘅成個過程，亦介紹過一啲相關嘅基礎知識。不過作為一個加密貨幣嘅BB班，我覺得仲有一啲嘢係係應該要識嘅，今堂埋齋就補完一下。
過數轉帳及翻查交易紀錄
加密貨幣其中一個最強大嘅地方，就係世界上任何嘅加密銀包都可以輕鬆、快速咁過數。大家如果上完加密貨幣BB班都未識「過數純熟迅速送出」，咁我都有啲過意唔去，所以呢樣嘢喺畢業前都要加鐘補返。
MetaMask截圖
各種常用嘅加密銀包功能，其實都可以喺第三堂介紹過嘅MetaMask搵到，包括：
- 過數俾人 - 撳上圖嘅 Send，填入對方嘅 Address，就可以過數俾人
- 收錢Address - 撳上圖嘅 Share my Public Address，可以 share 自己嘅 Address 俾其他人
- 翻查交易紀錄 - 撳上圖嘅 Transaction History，可以睇返自己嘅交易紀錄
存款入DeFi後唔見咗嘅？
若然你跟住上一堂嘅教學，去Compound/dYdX/Aave做存款，你會發理喺MetaMask睇唔到自己啲錢！大劑，係咪唔Q見咗？
zapper.fi 嘅示範畫面
唔洗驚，其實係MetaMask喺呢方面做得唔夠好，唔識得自動去check埋存咗入DApp嘅錢。有其他專門用黎睇transaction嘅網站喺呢方面做得好好多，例如zapper.fi。你可以用DApp Browser入去，Connect自己個wallet，又或者直接將自己嘅address貼上去，都可以一次過睇哂呢個銀包嘅加密資產，包括就咁喺銀包入面嘅錢，以及存咗入去DApp嘅錢，非常方便易用。
手續費GAS同交易速度
Opera修改手續費嘅畫面
如果大家嘗試過上兩堂講嘅存款，又或者嘗試過數，就會發現無論係 MetaMask 定係 Opera，都會有得俾你修改要俾幾多手續費GAS。有咩分別呢？要花少少時間了解多啲。
第三堂講過，啲礦工幫我哋喺網絡數簿上面mark數，係因為有手續費以及獎勵。網絡上有好多人想做交易，礦工可以揀做邊個order先。獎勵係固定咗（兩蚊ETH），而手續費就係由提出交易嘅人定嘅，所以對於礦工嚟講，就當然係選擇手續費高嘅嚟做。咁咪永遠都係得俾最高手續費嗰個order做得成？咁又唔係，因為網絡上都有無數礦工，只要你出嘅手續費同主流嘅接近，而當時區塊鏈又唔係非常繁忙，正當黎講都做得成，只係快定慢嘅問題。
手續費嘅計法分兩個數字：GAS price以及GAS limit。個理念就好似渣車入油咁，GAS price就係每公升油價，而GAS limit就係要完成你張order要用幾多油。GAS嘅單位係叫做Gwei，$1 Gwei = 0.000000001 ETH，而GAS limit就視乎你要做嘅交易複唔複雜，例如做智能合約會貴過率咁過數，總手續費就等如 GAS price乘以GAS limit。
Etherscan Gas Tracker 截圖
（終於回落嘅GAS價……）
聽過好鬼煩，好彩嘅係MetaMask以及Opera都識得幫我哋換算為港幣（記住去Settings度揀返個單位做港幣），上面嘅原理知道就OK。手續費一般我都建議揀快嘅，因為手續費差異唔太大，但可以避免GAS價波動導致等好耐。如果GAS真係升得太誇張，就寧願遲吓先落單。想知道最新GAS格走勢，就要記低呢個網址：Etherscan Gas Tracker
硬件銀包係乜東東
好流行嘅硬件銀包 Trezor（圖片來源： wikimedia）
第二堂提過有硬件銀包，今次亦會補返呢個位。大家了解咗成個加密俾幣存款，就會發現加密銀包可以控制價值好大嘅財產。無論係第二堂介紹嘅MyEthShop銀包，定係其他網站幫你generate嘅銀包，都屬於軟件銀包。你將十二個字嘅 seed phase import 入去 MetaMask 或者 Opera，個程式就會負責保管你條 private key。雖然呢啲程式都有非常強嘅保安，但呢個亦係不容忽視嘅風險。
而硬件銀包就係由一個USB手指嚟肩負呢個責任。啟用硬件銀包時依然會叫你記低 seed phase，但用呢個銀包係唔洗喺任何程式度輸入你嘅 seed phase，只係keep返做後備，萬一個硬件銀包壞咗先要用到。當你上DApp網站要連接銀包時，揀返你嗰個牌子，然後插隻USB落電腦或連接手機，入個密碼（啟用硬件銀包時set嘅），就可以透過Web USB嘅方法用個硬件銀包嚟認證交易。
揀硬件銀包要留意如果壞咗可以點處理（一般係開銀包時俾定個seed phase你），以及多唔多DApp支援嗰個牌子。網上你可以搵到好多硬件銀包嘅評價及比較，當中做得比較耐以及多人用嘅有 Trezor 及 Ledger。
點樣兌返做港幣
喺DeFi DApp度睇住自己嘅資產價值係咁跳，的確係令人幾興奮，但千祈唔好唔記得學埋點樣兌返港幣！DeFi靈活度高、唔洗好似銀行定期咁鎖死啲錢，但前題係你該得點拎返啲錢出黎嘛！不過唔洗驚，其實你識買幣及存款，好自然就識提款及賣幣，因為實際操作大同小異。
1. 由DApp withdraw到自己嘅銀包
dYdX 截圖
呢步就同上一堂講嘅存款差唔多，去返你存款嘅DApp度，會有「Withdraw」嘅功能，提取返啲加密貨幣去你嘅銀包。
2. 去找換店/交易所賣幣
Refer返BB班介紹嘅三個買幣途徑：
- MyEthShop：可以將加密貨幣兌換為港幣，並且直接過數落香港銀行户口
- Wirex：可以將加密貨幣兌換為港幣，但未能過數去香港銀行户口。可以用Wirec信用卡喺任價ATM提款（要手續費），或直接簽帳消費（無手續費，兼有加密貨幣回贈）
- crypto.com：暫時唔支援將加密貨幣兌換為港幣
我就用MyEthShop為例，講吓實際點樣做：
- 將加密貨幣轉入去找換店户嘅户口（可參考MYETHSHOP加密貨幣轉入詳細說明）
- 喺交易錢包度撳中間嘅雙箭咀，轉為賣出貨幣，然後揀你要賣嘅貨幣，輸入價格賣出（可參考MYETHSHOP限價盤交易詳細說明）
- 將港幣過返落自己嘅傳統銀行户口（可參考MYETHSHOP港幣轉出詳細說明）
用其他交易所嘅原理都係大同小異，不過目前可以直接過數去香港銀行户口嘅除咗MyEthShop之外都真係無乜邊間有，所以都係佢最直接。
如果用緊喺MyEthShop開嗰個銀包，就去個人錢包，揀要賣嘅貨幣，再發出去交易錢包
如果用緊硬件錢包或其他銀包，就去交易錢包，揀要賣嘅貨幣，撳轉入，再用MetaMask過數去MyEthShop
撳中間嗰個雙箭咀可以買/賣互換
最後轉出港幣去自己嘅傳統銀行户口
埋尾幾句臨别感言…
原先係想粗略介紹吓其他嘅DeFi projects俾大家認識，但諗真啲都係咁好啦，因為風險越大嘅嘢越需要深入了解，我唔想大家知得太少就踩入去。如果你都係同我一樣，覺得DeFi呢個領域好有趣，就多啲喺唔同途徑睇多啲唔同人嘅介紹以及分析，買唔買都唔係最重要，重點係唔好同時代脫節。
嚟到BB班尾聲，推介大家睇一睇MyEthLabs嘅呢一篇文，記住注意自己資產嘅安全！
Crypto新手 麻煩做齊10件事保護加密資產
最後，Blockchain及DeFi真係一個好有趣、好多變嘅topic，經常都有令人驚奇嘅消息，有興趣嘅話就留意多啲相關嘅新聞啦！以下係一啲可以參考嘅source：
| 進度 | 項目 | 內容 |
| 1 | 準備功夫 | |
| ✅ | 1.1 | 咩嘢係key同address |
| ✅ | 1.2 | 開找換店account |
| ✅ | 1.3 | 開加密銀包 |
| 2 | 由港幣換加密貨幣 | |
| ✅ | 2.1 | 認識買幣流程 |
| ✅ | 2.2 | ETH以及數簿記帳 |
| ✅ | 2.3 | 用 wallet app 查閱銀包 |
| ✅ | 2.4 | 介紹幾種加密貨幣 |
| ✅ | 2.5 | 介紹找換店/交易所 |
| 3 | 存款生息 | |
| ✅ | 3.1 | 認識 DApp |
| ✅ | 3.2 | 介紹幾種基礎存款生息渠道 |
| ✅ | 3.3 | 嘗試用 DApp browser 存款 |
| ☢️ | 3.4 | 介紹幾種進階存款生息渠道 |
| 4 | BB班畢業禮 | |
| ✅ | 4.1 | 檢視資產安全措施 |
| ✅ | 4.2 | 認識硬件加密銀包 |
| 🙅 | 4.3 | 認識其他投資渠道 |
| ✅ | 4.4 | 其他加密貨幣資訊拾遺 |
Posted from my blog with SteemPress : https://hkxforce.net/wordpress/7655