本系列文章講解如何在香港開設及操作加密貨幣户口，並以廣東話書寫，敬請留意。
其中幾個主流 DeFi project 嘅利率（2020-09-15截圖）
過去一呢年，好多人都講緊要開離岸户口，研究點樣應付金融機構隨時凍結户口嘅危機，以及應對中共強權治港所帶來嘅種種不穩定風險。但係我始終認為金融機構就係以利為先，唔會同錢作對，如果寄望外國銀行就必定唔會向中共低頭，又未免太天真。早排路透社就報導過，多間國際銀行都會審查存款係咪同香港民主運動有關。
早排高兄將加密貨幣戲稱為「離地户口」，其實都幾切合香港人嘅需要，亦令我打算講吓我係點樣將啲資產轉變為脫離傳統金融機構嘅離地虛擬户口，強力部門都無方法凍結我，並且同美元掛鈎避開港幣不確定因素嘅風險。仲可以透過 DeFi 賺取 3-10% 年息（甚至更高）嘅回報，秒秒鐘派息，隨時可以提款，唔似傳統銀行要做定期先有高少少嘅息。
引言
廢話少講，首先一張圖睇哂成個flow大概係點：
然後先同大家 brief 吓呢個BB班系列（暫定）會點樣講解：
乜話？分咁多篇？我都明白大家TLDR，原本確實係想寫一篇簡單又即食嘅入門教學俾大家，但經過兩個幾月重寫又重寫之後都係放棄咗。加密貨幣以及 DeFi 相對於大家由細接觸嘅金錢以及金融有太多唔同嘅地方，唔係話要變成專家先好踩落去，但至少對一啲concepts要有基本認知，否則好易出事。如果我一味叫大家跟住我做又唔講解，就實在太不負責任，過唔到自己嗰關。
大圍吹水篇
呢篇作為引子，我會先講吓加密貨幣離地户口嘅特點，點解 DeFi 值得留意，以及我自己點看待 DeFi。咁大家睇完有個大概嘅印象之後，可以諗吓仲繼唔繼續睇我廢up。
點加密又點離地法
圖片來源：pixabay
簡單黎講，加密貨幣係一種建基於「區塊鏈（Blockchain）」嘅虛擬資產，要理想解加密貨幣就要先理解區塊鏈。區塊鏈係一啲數簿（賬簿 ledger），任何人只要好簡單咁generate一條密碼鎖匙（私鑰 private key，一串水蛇春咁長嘅字母及數字），就可以喺呢啲數簿上mark數。呢啲數（賬目 transaction），就係記錄咗每一個人持有幾多加密貨幣。
區塊鏈數簿分散喺網絡上，任可人都可以參與存放及處理數簿（節點node）。數簿上每加一行都需要通過加密技術認證，全網同步更新，任何人都可以查核。若然有人想做數，就要同時删改全網過半數嘅數簿，係非常之難做到，所以具規模嘅區塊鏈上嘅賬目可信度係非常之高。舉個例，數簿上寫住我嘅賬戶有$1000蚊，就無人能夠修改呢修紀錄，就算強力部門都無法燒我數簿。只有我先有權調動呢一千蚊，例如加一行紀錄話我俾咗$50我個frd，因為我擁有我嘅户口條key。
要完整啲、深入啲咁講解就真係一匹布咁長，下一篇我會再講吓加密銀包（錢包 crypto wallet）係點開以及點運作。
點解 DeFi 值得留意
DeFi 即係 Decentralized Finance，無中央監管機構嘅金融體系。頭先講完，加密貨幣本身就係源自網絡數簿，由網絡社群去運作及監察。好多人睇到貨幣數碼化帶黎嘅無限可能性，當中區塊鏈配合智能合約就最受注視，以 Trustless 代替 Trust，足以顛覆現種種金融限制。
圖片來源：pixabay
DeFi 第一個值得留意嘅原因，係以往要人手做嘅嘢全部變成程式，過去中間人賺取嘅利潤可以直接落返投資者嘅袋。舉個例，過去我哋存錢入銀行，銀行再借錢出去，兩者利息嘅差距就係銀行嘅利潤，因為佢有能力評估人哋還唔還到錢以及承擔違約風險，而民眾普遍信任銀行（or無得揀之下唯有信任）。但喺 DeFi 數碼世界，當一個人放低抵押品去借錢，智能合約已經規定當抵押品嘅價值跌低過某一個位，就自動變賣抵押品。有閒錢想借出去嘅人亦毋須搵銀行，而係透過建立智能合約黎將啲錢放入一啲借貸平台，智能合約自動將借貸收益分俾存錢嘅人，完全毋須人手操作。
第二個值得留意嘅原因，係佢提供咗一個入場門檻極低而又無地域限制嘅存款及投資途徑。正當好多人煩惱緊傳統銀行嘅離岸户口入場費好高，擔心自己資產喺未來嘅安全，加密貨幣就係全球一視同仁嘅。香港人都可以輕易存款入去任何國家嘅平台，可以投資去任何國家嘅人發起嘅 DeFi project，而且去到邊都可以控制自己嘅資產。
第三個值得留意嘅原因，價格穩定嘅加密貨幣以及基礎較穩固嘅 DeFi project 逐漸流行。好多人對加密貨幣嘅認知，就只係知道 Bitcoin 價格非當波動，風險好高。但事實上近年加密貨幣之中嘅穩定幣發展蓬勃，幣值同美元掛鈎（兌換美元1:1），而且有實質存款或供求機制去維持匯率。對於想追求資產安全之餘又想有較高回報嘅人，DeFi 係非常值得考慮嘅工具。
我自己點看待 DeFi
可能你想問我，「講到DeFi咁好，你自己係咪瞓身落去先？」老老竇竇，我真係無瞓身。我始終覺得呢個世界凡事都有風險，一方面唔好除便拎自己啲血汗錢嚟較非，同時喺自己可以承受嘅風險之下希望有高啲回報，老套啲講就係要分散投資。同埋記住要睇多啲聽多啲，唔好信哂一個人，包括我。
我自己係好保守嘅人，過去嘅儲蓄及投資主要都係美金結算嘅儲蓄保險，現時大約佔我資產組合嘅大約五成半。 DeFi 首先吸引我嘅係穩定性以及回報，而且唔洗鎖死啲錢，隨時可以調動資金。所以我嘗試花時間了解一下，究竟喺自己嘅資產組合中加入 DeFi 應該點樣安排。而家大約有一成資產放喺 DeFi，都係集中喺中低風險嘅 project。
披露一下自己嘅資產分配
DeFi 嘅特點係創新速度快，但同時投資之前記得停幾停、諗多諗。因為成個加密貨幣都係開放嘅系統，任何人諗到勁嘅idea又搵到人去寫program就可以推出，創新速度快得驚人。如果你係對網絡技術以及金融投資有興趣，就算唔係想賺大錢，淨係睇啲人搞乜、諗乜都已經非常有趣。不過無中央監管嘅 trade-off 就係投資者要自己做更多功課（雖則有監管都唔見得可以阻止啲豺狼搶錢），尤其係對啲貌似好很勁嘅新 project，又或者回報異常高嘅 project，真係要睇多啲人嘅分析。無輸嘅心理準備，就唔好玩嗰啲嘢。
摸索咗一段時間，我感覺到一般人要接觸及投資 DeFi 有兩大難題。一係技術門檻，加密貨幣及 DeFi 有好多名詞同我哋日常生活相似（甚至相同），但事實上背後好多關鍵理念有分别，要搞清楚之後先明白呢個生態點運作。二係手續費，雖則話穩定幣有隱定嘅兌換價，但唔同交易所嘅手續費有差異，調動資金嘅手續費（gas）又時高時低，要真正知道投資落某一啲project係咪有合理回報，就要考慮埋呢啲因素。
於是我就想寫呢系列嘅BB班文章，講吓點樣越過呢兩個難題，去了解及接觸DeFi世界。我其實都只係比BB班高少少，好多嘢仲係摸索中，有錯漏請留言指點。下回由銀包開始講點樣踏入DeFi世界，今次先俾大家睇吓成個BB班嘅syllabus，有興趣嘅話過幾日再見大家：
| 進度 | 項目 | 內容 |
| 1 | 準備功夫 | |
| 1.1 | 咩嘢係key同address | |
| 1.2 | 開找換店account | |
| 1.3 | 開加密銀包 | |
| 2 | 由港幣換加密貨幣 | |
| 2.1 | 認識買幣流程 | |
| 2.2 | ETH以及數簿記帳 | |
| 2.3 | 用 wallet app 查閱銀包 | |
| 2.4 | 介紹幾種加密貨幣 | |
| 2.5 | 介紹找換店/交易所 | |
| 3 | 存款生息 | |
| 3.1 | 認識 DApp | |
| 3.2 | 介紹幾種基礎存款生息渠道 | |
| 3.3 | 嘗試用 DApp browser 存款 | |
| 3.4 | 介紹幾種進階存款生息渠道 | |
| 4 | BB班畢業禮 | |
| 4.1 | 檢視資產安全措施 | |
| 4.2 | 認識硬件加密銀包 | |
| 4.3 | 認識其他投資渠道 |
Posted from my blog with SteemPress : https://hkxforce.net/wordpress/7577