YANG JEUT KEU BATEU PUASA

Na ulon baca lam saboh kitab
Kitab jih arab lon seubot nama
Sinan meutuleh dalam saboh bab
Lengkap ngoen syarat rukon puasa

Bateu puasa pih na geu tuleh
Lengkap ngoen bareh lafai ngoen makna
Lon cuba surah keu bandum wareh
Teubai ngoen lipeh lon ci peunyata

Lage geu tuleh lam kitab fiqah
Lon cuba surah siala kada
Lon cuba surah ubena meufom
Keubandum kawoem wareh syadara

Yang keu phoen bateu jinoe lon peugah
Lam ruhung babah atau kepala
Atau lam hidong atau lam punyung
Atau jeut ruhung laju lon peugah

Hanjeut ta pasoe meu sapue benda
Bateu puasa meunan lam surah
Lam ruhung idoeng meunan cit punyung
Man mandum ruhung wajeb peulara

Meunan ciet ubat pasoe lam ulei
Adak peureulei bateu puasa
Meunan cit ubat boeh bak tsakalen
Atau suaten bak laen surah

Meunyoe ta muntah watee cot uroe
Meunan cit bagoe wahee syedara
Sebab muntah nyan najis yang kutoe
Meunyoe oeh uroe bateu puasa

Han jeut eh dua oeh watee uroe
Han jeut ta peutoe ngoen ma sidara
Roeh meu seutuboeh inong ngoen lakoe
Nyan pih hai adoe bateu puasa

Meunan cit inzal teubiet mani droe
Bak kalon binoe buleun puasa
Atau bak mayang bak eh cot uroe
Mani ji pupoe bateu puasa

Meunyoe yang inoeng troeh watee kutoe
Walau si uroe haed kelua
Bateu puasa ngoen seubab kutoe
Beuna meurunoe wahee nyak dara

Meunan cit nifas nyoe kana lakoe
Karap troek uroe bayi keulua
Ji teubiet darah yang kutoe kutoe
Meunan cit adoe bateu puasa

Atawa pungoe koen peu pungoe droe
Pungoe keu lakoe atau keu janda
Ka putoh kawat jilhap tiep uroe
Nyan pih lom bagoe bateu puasa

Pulom teu meurtad etikeud salah
Ka miseu Allah roeh takheun dua
Roeh takheun sulet di rasulullah
Nyan pih lon surah bateu puasa

Kabeh lon seubut lagee lon teupu
Lagee kheun teungku surah lon rika
Lon eu lam kitab koen baca buku
Hana pu ragu wahee syedara

Sekian.